अन्तरजातीय विवाह गर्ने युवतीलाई प्रहरीले अपहरण गरेपछि...

अन्तरजातीय विवाह गर्ने युवतीलाई प्रहरीले अपहरण गरेपछि... Like and click Rupeshprasaila.blogsport. com राजविराजः सर्वसाधारण जनताको सुरक्ष...

अन्तरजातीय विवाह गर्ने युवतीलाई प्रहरीले अपहरण गरेपछि...

Like and click
Rupeshprasaila.blogsport.com

राजविराजः सर्वसाधारण जनताको सुरक्षा गर्ने प्रहरीले नै अपहरण शैलीमा घरबाट लगेर एक महिलालाई बेपत्ता बनाएको भन्दा धेरैलाई आश्चर्य लाग्न सक्छ । तर, इलाका प्रहरी कार्यालय कल्याणपुर सप्तरीका प्रहरी निरीक्षक सूर्यनारायण यादवले प्रहरी आचरण र नीतिविपरीत यस्तो काम गरेको पत्ता लागेको छ ।
प्रहरी निरीक्षक यादव, प्रहरी नायब निरीक्षक जयप्रकाश साहसहितको टोलीले गरेको यो अनौठो कामविरुद्ध उजुरी परेपछि मात्रै यो घटना सार्वजनिक भएको हो।
सप्तरीको इनरुवा फुलवडिया ९ का एर्शाद हुसेनसँग अन्तरजातीय विवाह र अदालतबाट नाताकायम गरी बसेकी सिमरन मण्डल खत्वेलाई गत भदौ ३१ गते पुरुष प्रहरीहरुले दुईतिर समाई मोटरसाइकलको बीचमा राखेर जबरजस्ती लगेको उनका ससुरा जियाउल हकले बताए ।
प्रहरी कार्यालयमा उजुरीसहित धाउँदा पनि सिमरनबारे कुनै जानकारी नपाएपछि हकले जिल्ला, अञ्चल र क्षेत्रीय प्रहरी कार्यालय तथा राष्ट्रिय मानवअधिकार आयोग, जनकपुरमा निवेदन दिएका छन् । उनले उच्च अदालतको राजविराज इजलाशमा गत असोज ७ गते बन्दी प्रत्यक्षीकरणको रिट दिएपनि हालसम्म सिमरनलाई उपस्थित नगराइएको गुनासो गरे ।
लहानमा सँगै पढिरहेका एर्शाद र सिमरनकाबीच प्रेमसम्बन्ध भयो । प्रेमविवाह गरेका उनीहरुलाई पटक–पटक छुट्याउने प्रयास भयो। कल्याणपुर प्रहरीले भदौ १ देखि ६ गतेसम्म दुबैलाई बिना पुर्जी थुनामा राख्यो ।
एर्शादका अभिभावकलाई ‘अपहरण तथा बलात्कार मुद्दामा एर्शादलाई ११ वर्ष कैद हुने’ धम्की दिएपछि डराएर उनीहरुले प्रहरीको मागबमोजिम भदौ ६ गते दुई लाख पाँच हजार दिएर एर्शादलाई छुटाएर घर लगेको एर्शादका हजुरबुवा मो. इमामुद्धिनले बताए । उता सिमरनलाई उनका काका शोभित मण्डलको जिम्मा लगाइयो ।
जतिपटक भागेपनि र मन्दिरमा विवाह गरेपनि सम्भव नभएपछि उनीहरुले सल्लाहबमोजिम सप्तरी जिल्ला अदालतबाट भदौ २७ गते नाताकायम गराए । नाताकायम पछि उनीहरु ढुक्कले घरमा बस्न थालेका थिए ।
तर, भदौ ३१ गते प्रहरी निरीक्षक यादवसहितको चार जना पुरुष प्रहरीको टोलीले अदालतको नाताकायमलाई वेवास्ता गर्दै सिमरनलाई जबरजस्ती उठाएर लगे । ‘हामी एक अर्कासँग प्रेम गर्छौ, एकअर्का बिना बाँच्न सक्दैनाँै, अदालतबाट नाताकायम पनि गरेका छौं’ भनेर दुवैले प्रहरीसमक्ष जिद्दी गरिरहे । तर, प्रहरीले सिमरनलाई कल्याणपुरको एक एम्बुलेन्समा राखेर माइत पु¥यायो । प्रहरी निरीक्षक यादवले भने इलाका प्रहरी कार्यालय लहानले घरबाट बेपत्ता सिमरनलाई जिम्मा लगाउन पठाएको र पत्रअनुसार जिम्मा लगाएको बताएका छन् ।
पूर्वमन्त्री राजलाल यादवको प्रतिबद्धतामा दुबै पक्ष बसेर सिमरन र एर्शादलाई सामुन्ने राखेर छलफल गराउने र सिमरन राजी भएमा दुई लाख पाँच हजारसहित सिमरनलाई एर्शादको जिम्मा लगाउने सहमति पनि भएको थियो । यसरी सहमति र अदालतको आदेश समेत कार्यान्वयन नहुँदा एर्शाद परिवार निराश भएका छन् ।
प्रहरी उपरिक्षक भिमप्रसाद ढकालले प्रहरी निरीक्षक यादव र प्रहरी नायव निरीक्षक साहसँग स्पष्टिकरण सोध्नुका साथै छानविन समिति नै गठन गरी कारवाही प्रकृया अगाडि बढाएको बताए ।